KALAKUTA

Where you dey?

Where you dey!!!!

Awoba

Agwu

Ison

Jok

Katonda

Kwoth

Leza

Ikenga

Amadioha

Ayaba

Da

Lisa

Anansi

Asa

Gu

Ngami

Pan

Ruguba

Olorun

Ogun

Ruhanga

Aganju

Ori

Yemoja

Roog

Koox

Takhar

Sakarabu

Shango

Rock-Sens

Oba

Nzambi

Oduduwa

Shango

Soko

Zinsu

Zinsi

Sogbo

Abassi

Ala

Ogbunabali

SPEAK!

Na you be the reason my life na mess

Your priests say na trials but when I catch you lie that one too na test

I hear say your time na the best time

Agu, na only you dey defend all your worshippers, Mayweather na pipe

But where you dey when oyinbo carry your people go Egypt and Babylon

You just clap for them or maybe assist them to score

Put whistle for your mouth jejely wait for time to come

Till now e never come just like thy kingdom come 

All your sacred shrines...to say I know I for shit there,

smelling shit wey go invite maggots within two minutes

After the Owambe give them 'Thanks for coming' souvenir

Fo sho command them to bring their maggot country within a minute

Oyibo burn your most sacred shrine just after we pray

I wait for thunder to strike am but thunder gba brake

May be the thunder still dey inside Lagos go-slow

No be go-slow na go-stop, cos even till now the thunder never drop

STOP!

I pray

I pray

My sisters pray

My brothers pray

Palee pray

Malee pray

Our ancestors pray

The whole village pray

When we pray we give you drinks, we give you food, we give you all

We sacrifice everything to you even our virgins' blood but.....

STOP!!!!!!!!!

THE BLASPHEMY MUST STOP!!!!!!!!!!!

Or what?

The gods are angry, You don blaspheme ba

Anything wey don happen no blame the gods. No blame the gods

Anything wey dey happen no blame the gods. No blame the gods

Anything wey go happen no blame the gods. No blame the gods

Ola yan us "The Gods Are Not To blame". So no blame the gods

When I talk, you sey I be woman. Yes, yes I agree

With all your problems the gods no send, now you dey nag abi

Nagging na my ting you even say na my birthright

Why you come dey form Jacob for this broad day light

Na me be your all and all before yanch dey for back

Before you learn how to wash your yanch. Before you stop to dey baf outside

Before you promise me heaven and earth, I no fit forget that ungodly night

You promise me I go be your wife, but na only your desires

You want pikin, nine months stroll pass I born you Belief

Na your late mama carbon copy. Tomato Jos sweet

Na she be the reason them put 'beautiful' for dictionary self

You personally make sure sey she get everything she cry for, you self

When she clock twenty five, you no allow another guy say hi

to her. For our very bed you defile her for my korokoro eye

No Vex

I no dey vex, I want make you see your mistake

If to sey you stop to dey have your way

If to sey you control your lust every single day

If to sey you let her marry at that age

If to sey you allow us plan for our family

If to sey that night you no suck my tender bobby

If to sey na only me and you, and no Belief

If to sey you no believe in gods, no blame to give.

You go make mistake and right your wrongs. No time to pray

You go learn to know, and know to learn. No time to pray

MORTAL!

YOU WILL NEVER EVER UN'STAND MY WAYS

MY SILENCE IS LOUDER THAN A ZILLION MAGNITUDE EARTHQUAKE

POWERFUL, IT CAN TURN YOUR TURBINES GIVE YOU POWER FOR TRILLION DECADES

MY WORDS ARE LIFE. HOW CAN THE SUN I MADE SHINE BRIGHTER THAN MY FACE?

SURELY, IT COMES A TIME WHEN A TALL BUILDING WOULD CHALLENGE THE SAND

A.I. TO HUMANS, AS THE ANTHILL CHALLENGES ANTS

THAT'S WHAT YOU DID, WHAT YOU'RE DOING INTO THE FARTHEST FUTURE TENSE

MORTAL!!

I LET YOU FACE LIFE WITHOUT ME

YOU SAY, 'YOU ONLY LIVE ONCE', 'LIVE AND LET LIVE'

IT'S ALWAYS TRIBE AGAINST TRIBE. RULE AFTER DIVIDE

THE WHITES PLAYED IT TOO. SOLD YOU JESUS, SO YOU WON'T MAR THE HIVE. 

All gods na the same, as-salamu alaykum

Create the world flat or round, as-salamu alaykum

Make humans give them brains, as-salamu alaykum

Waʿalaykumu as-salām to all my goons in hood

Today I don salam, I surrender to my maker

Gimme Belief. My oblation, I submit my brain abeg take her

Now wey I don sabi the Quran pass Prophet wey write am

Na to kill for Allah especially those kafirs wey no like am

Na true tori be that, no wonder jihad no dey finish

AND CRUSADERS?

Be like sey Jesus get blood bank and him tank don full reach

No be so e dey before before church marry state and reformation

Hail Mary to the Queen, Hallelujah to the Pope declaration

The mass in the Mass go do the Amen like sey na God talk am

Now church na serious business thank God for Christ wey invent am

Pastopreneurs with their marketing skills don turn believers to customers,

So no blame the customers wey believe their pastors pass the Bible

Who dey read the manual wey come with him phone? I taya

Them dey live their lives like móloe without wheel and tire

Pastor this, Mallam that, them don forget the function of their brains

I want money, I only need to pray, sow a seed, and wait for my miracle

Tomorrow na El Classico, I sure say God go don receive enough prayer request

And if Madrid win, that one go mean sey God no answer Barca prayer request

No juju wey African teams don carry go world cup wey work

Their Juju no dey roam, E be like sey for jant them no get network

DON'T USE RELIGION TO JUSTIFY YOUR MEDIOCRITY NOR

BLAME GOD FOR ANYTHING. WHAT'S YOUR BRAIN MADE FOR?

I bin blind now I dey see, water no be sea

I bin blind now I dey see, water no be sea

Give them Belief, no need for brains. Serve the gods, grow your faith

Close your eyes repeat after me "Na only faith e take"

Believe your prophet, another man, more than your own senses.

That's why I no dey pray cos everyday I dey on my menses

by your shrine standard, I dey unclean. If I doubt you go call me Thomas

If I sacrifice my mother to you, your priest say you go give me wealth as bonus

Why e be say your own dear priest poor pass church rat

Why e be say them like to make unrealistic demands like spoilt brat

A man go meet you for charms to kill him follow man

E no matter the person him wan kill as long as him meet your demands

Like pregnant mosquito, eagle with one eye,

vulture with six wings, doll baby wey dey craze

To make me rich na virgin blood, my manhood abi my wife

womb, or make my first child craze.

I bin blind now I dey see, water no be sea

I bin blind now I dey see, water no be sea

Na religion our Obas, Igwes, Emirs take dey use our heads

For god sake we just submit our brains drop am on top their beds

Any happening wey the priest, king and gods no understand

Na to call am taboo (aru) and make a decree for instance;

Kill those twin! If no be taboo na superstition

No whistle for night, no allow people to cross over you

No kill wall gecko, no hit any man with broom

Another instance we choose to short our brains for Belief

The only one I believe sha na when my palm scratch me

Sure banka the within that week I go get money

I bin blind now I dey see, water no be sea

I bin blind now I dey see, water no be sea

WHY OTHER COLOURS ARE GLITTERING, ADVANCING SUNWARDS

YOU'RE STILL BLINDED BY RELIGIONS AND TRADITIONS YOU CREATED OR BORROWED

CHAINED BY BELIEF AND YOUR STATIC CULTURE. THUS AND THUS,

PRAY AND PRAY MORE WHEN YOU SHOULD BE USING YOUR BRAINS TO CREATE YOUR TOMORROW

YES, OPEN YOUR EYES FOR YE ARE GODS

I GAVE YOU POWER TO CREATE, THAT'S WHY I STOPPED.

Kal!!!!!!!!!!!!!!!!!!!!

I be wetin you feed me, I no be grey I no be red

Now now now, make una two leave my head!!!!!!!!!

Key:

THE GODS' WORDS IN CAPITAL

Kalakuta's words in italics

His words in normal font